【Emily】過年換新鈔 伯伯「好開心」話利市加碼

【明報專訊】農曆新年將至，3間發鈔銀行噚日起至年廿九（16日）開放換新鈔及「迎新鈔」（簇新嘅舊鈔）畀市民封利市，唔少市民噚日一早去排隊。中銀香港、匯豐及恒生銀行喺頭3日會提早開門，朝早8點至9點專門提供換鈔服務，市民區先生（圖）就特登提早出門，朝早7點幾去到旺角匯豐分行輪候，換到新鈔後話好開心，又話換咗幾千元，預計利市會「雙封、加碼」。除咗親身到3間銀行換新鈔，唔同地點亦設有「迎新鈔」櫃員機，提供20元同50元紙幣。