【Emily】八達通新春推「一嘟即發」獎賞

【明報專訊】仲有兩個禮拜就過年，八達通噚日宣布推出「一嘟即發」新春贏獎賞活動，喺農曆年廿七（14號）至大年初三（19號）期間，用手機八達通或者「樂悠咭」喺指定商戶門市用佢哋嘅新八達通機拍卡消費，單次滿100元就有機會即時贏到價值28元嘅八達通獎賞，即時可自動抵消嗰次嘅交易額，實現「一嘟即發」。

此外，即日至今個月28日，全港29個參與活動嘅零售同餐飲商戶，會同步推出農曆新年限定購物優惠，涵蓋辦年貨、團年飯、新春聚會等，例如喺美心MX午市同晚市幫襯滿60元即減8元，喺太興、敏華冰廳、靠得住同茶木等太興集團指定餐廳外賣自取滿150元即減10元。

至於點先知道自己「一嘟即發」贏到幾多錢？八達通就請嚟商台主持黃正宜（阿正）聲演，用戶拍卡付款時會聽到阿正講「恭喜你贏咗價值（獎賞價值）蚊八達通獎賞」，就代表贏到新春獎賞嘞。