【Emily】九巴寵物團2‧9起 每日出發加開5線

【明報專訊】九巴之前推出「寵物巴士團」，等一眾貓奴才、狗奴才可以同「主子」一齊遊巴士河，但一直只係喺周末同公眾假期先有團。不過嚟緊九巴決定，由下個月9日開始，「寵物巴士團」將會變成每日出發，仲會有5條新路線𠻹，各位貓奴狗奴要密切留意喇！

新上落點：西營盤鰂魚涌太古

5條全新路線分別以西九文化區同埋西沙Go Park為中心，往返港九新界唔同地方，今次增設西營盤、鰂魚涌同太古做恒常上落車地點。除咗改為每日出發，周末同公眾假期會延長服務時間，兼且班次會加密至每45分鐘一團。

至於票價，除咗一人一寵單程收費35元，九巴同日起推出「寵物巴士團」七日票，一人一寵收80元，兩人一寵就100元；月票方面，一人一寵就收150元，兩人一寵185元，購買七日票或月票嘅65歲或以上長者有半價優惠。