【Emily】邵逸夫獎增計算機科學獎 遴選主席：Steve Jobs都唔適合攞

【明報專訊】邵逸夫獎基金會噚日宣布增設計算機科學獎，係邵逸夫獎2002年創立以來第一次新增獎項類別。擔任遴選委員會主席嘅美國加州大學柏克萊分校計算、數據科學與社會學院院長珍妮弗．蔡司（Jennifer Chayes）強調，就算強如蘋果公司創辦人喬布斯（Steve Jobs），都唔係合適人選，因為雖然佢係產品設計天才，但對計算機科學嘅基礎研究並無卓越貢獻。

重基礎研究 名單明春公布

連同新設獎項，現時邵逸夫獎共有4個獎，包括天文學、生命科學與醫學、數學科學同計算機科學獎。新獎項沿用現有三大獎嘅管治架構同遴選準則，每項獎金都係120萬美元（約936萬港元）。

計算機科學獎提名期由今年9月至11月，首屆得獎名單明年春季公布。Jennifer話，計算機科學屬於較年輕嘅學科領域，但急速發展下，正深深改變人類生活同其他科學研究範疇。佢又形容呢個學科係一門研究各種形式嘅資訊與運算嘅科學，探索如何收集、呈現、處理同轉換資訊以解決問題，遠比編程或人工智能廣闊。

科大前校長、計算機科學獎籌劃委員會主席兼遴選委員會委員陳繁昌透露，籌劃委員會入面有3位圖靈獎得主同1位圖靈獎評選委員會委員，大部分委員都係國家級院士。