【Emily】私隱署30周年 辦小學音樂劇講AI安全

【明報專訊】個人資料私隱專員公署今年迎來30周年，將舉辦多項教育同推廣活動，其中前日舉辦咗小學巡迴音樂劇《私隱劇場：AI「智」安全》專場。音樂劇講述一個小五生使用AI同社交媒體，因忽略私隱風險而被網絡欺凌，令佢同親友深受困擾。呢套劇今年會喺30間小學巡迴演出，公署希望提高學生認識點樣安全使用AI同慎用社交媒體，拒絕網絡欺凌同「起底」行為。

公署今年仲會舉辦30周年電台廣播、人工智能安全及網絡安全企業峰會、保障私隱峰會，同埋AI及私隱保障培訓等。30周年誌慶主題係「守護私隱．改革創新」，私隱專員鍾麗玲話寓意公署喺瞬息萬變嘅數碼時代，既要堅守保障私隱嘅初心，做好「守護者」本分，同時求進創新，喺AI世代中擔當好「改革者」角色。

公署另推出30周年誌慶標誌，寓意喺數碼時代，公署如同一把鎖，守護大眾嘅個人資料私隱，同時象徵公署致力推廣AI同數據安全。