【Emily】迪士尼推港人優惠 結伴同行入園七五折

【明報專訊】馬年快到，香港迪士尼樂園推出一系列新春慶祝活動，包括今個星期六（24日）至5月3日期間，二人或以上同行，可用正價嘅七五折購買一日門票，只限香港居民。

優惠門票要預早3日喺樂園網頁訂購，換言之，優惠門票由今日至4月30日發售，一齊買嘅優惠門票必須同時入園。每張門票包含商品同餐飲電子優惠券各一張，可以喺商品店同戶外小鎮雪糕店使用。

園方又會趁馬年推出新年開運福袋，每個488元，入面會有隨機一款限定騎馬接福系列嘅Gelatoni、StellaLou或LinaBell毛公仔，仲有其他迪士尼商品同新年糕點禮盒等。

另外，喺樂園內任何商店或香港迪士尼官網單一交易淨消費滿488元或以上，並購買至少一件迪士尼農曆新年主題商品，可以參加抽獎，獎品包括園區酒店國賓廳主題套房、白金卡年票、周大福足金吊墜等。