【Emily】學友社年度新聞 觀浪墮海第一

【明報專訊】超強颱風「樺加沙」舊年襲港，3個人觀浪墮海，引起社會討論，亦成為中學生眼中嘅十大新聞首位，得票率超過57%，第二位得票率同樣過半，就係男團MIRROR成員姜濤喺西環跑步時墮海，當時其公司話佢跑步期間頭暈，醒番已被救起，姜濤之後就喺社交平台報平安。

學友社每年舉辦嘅全港中學生十大新聞選舉噚日公布結果，舊年嘅十大新聞由125間中學4.6萬多名學生投票選出。

除咗姜濤墮海，學友社認為，另外有3則十大新聞都屬於當時嘅話題，包括第四位嘅網紅Speed訪港，第五同第六位分別為「太空油」正名「依託咪酯」同《哪吒2》破世界動畫電影票房。學友社話，4則新聞當時都有好多人關注同討論，仲有不同短片喺社交平台廣傳，因此更能獲中學生關注。至於與學生息息相關嘅取消學生津貼就成為第三位，得票率近49%。

學友社話，中學生對人工智能相關新聞好關心，頻頻發生嘅deepfake案件喺上一屆躋身十大，今年就有內地人工智能模型「DeepSeek」面世成為第八位。