【Emily】立會18事務委會名單出爐 江旻憓無入文體會

【明報專訊】立法會秘書處噚日公布18個事務委員會嘅委員名單，根據《內務守則》，每個議員唔可以同時出任多於6個委員會嘅委員。今個會期有兩個議員達到上限，分別係自由黨主席、批發及零售界邵家輝，同埋工聯會嘅選委界梁子穎。

11會滿額 司法最少人入

除咗立法會主席李慧琼，89個立法會議員平均加入3.6個委員會。當中「微笑劍后」、旅遊界江旻憓加入4個事務委員會，包括教育、交通、經濟發展及環境，但無加入民政及文化體育委員會。加入兩個委員會嘅有3人，分別係醫衛界林哲玄、經民聯黨魁工業界（第二）吳永嘉，同埋選委界黃錦輝。

根據《議事規則》，每個事務委員會須由最少6個委員、最多20個委員組成。今年會期有11個事務委員會滿額，司法及法律委員會最少人，只有10人，當中9個本身係律師，包括法律界陳曉峰，同埋律師會前會長、選委界蘇紹聰等。

各會主席全由「舊人」出任

各會嘅正副主席噚日起接受提名，據Emily了解，協調小組早前已經開會討論，各個主席將會全部由「舊人」出任，副主席都傾向「舊人」出任，畀新人以委員身分先熟習會議流程。