【Emily】食茶記扮演戲 周深幫旅發局sell港味

【明報專訊】除夕同元旦喺香港開演唱會嘅內地歌手周深，早前應旅發局邀請拍攝《深聲漫遊》短片宣傳本地文化，佢去咗「茶記」食蛋撻同飲紅豆冰，去維港搭帆船，並即興用廣東話演繹港產片《花樣年華》經典台詞：「如果有多一張船飛，你會唔會同我一齊走？」相信唔少「生米」（周深粉絲暱稱）都想跟佢走。

周深香港行首站去咗搭帆船，佢見到尖沙嘴鐘樓時話，對香港嘅感覺當然存在喺港劇中，形容香港係非常熱鬧同國際化，係一個非常立體嘅城市。一直想做《食神》嘅周深之後去咗茶記食菠蘿油同蛋撻等地道美食，又話對經典台詞「只要有心，人人都是食神」記憶猶新，食完菠蘿油覺得自己好似港劇主角。

鍾意港劇同港產片嘅周深又去咗《金枝玉葉》取景地藝穗會同都爹利街、文武廟等地，佢特別推介大家去舊油麻地警署嘅「油蔴地警署光影之旅」展覽，體驗吓獨特嘅港產電影文化氛圍。