【Emily】議員「搶閘」發言 話撳掣秘技唔work 代李慧琼 陳振英短暫坐主席位

【明報專訊】今屆立法會噚日開首次大會，新任立法會主席李慧琼特登從果欄入貨，請傳媒食車厘子，而喺佢離席期間，就由內務委員會主席陳振英暫代主持會議，首次坐上大會主席位，雖然係「新手」，但兩人過往有唔少主持會議經驗，會議整體暢順。

被問坐骨神經痛情况 李家超：OK

至於患坐骨神經痛、早前為議員監誓時要扶住茶几嘅特首李家超，噚日出席會議時無再撐拐杖，行動自如。有傳媒問佢康復進度，佢答「OK，多謝」，記者再追問大埔宏福苑原址重建嘅可能，佢就無回應。

今次亦係一眾「新丁」議員首次喺會議廳發言，新界東南方國珊、選委界別陳宗彝發言時先用咗十幾秒調整收音咪，後續發言順利。議員都好肉緊「搶閘」發言，開放撳發言掣無耐已有超過80個議員輪候。飲食界梁進同Emily講，本身目標係頭30個人發言，已經出盡力撳掣，不過撳掣時聽到背後一片撳屏幕聲已經「心知不妙」，最終排第60幾位發言。港島東植潔鈴就話知道發言次序搶手，所以一開頭無特登搶撳。

早前有資深議員傳授撳發言掣秘技，包括兩隻手指快速輪流撳掣。噚日多個議員同Emily講，出動到幾隻手指齊齊撳掣，都搶唔到較前次序，唯有下次努力。