【Emily】謝克藝術展 大師級珍藏亮相

【明報專訊】香港資深藝術家謝克將舉辦「從心所欲7050：謝克當代藝術創作及收藏展」，紀念佢邁入70歲、走入藝術世界50周年。除咗謝克嘅作品，展覽仲首度公開佢珍藏多年嘅20件當代藝術品，包括黃永玉、趙少昂、靳埭強、隋建國等藝術家嘅作品，展覽下星期五（16號）喺香港藝術中心5樓包氏畫廊開幕，展期至今個月22號。

生於香港嘅謝克，1980年代初喺北京中央工藝美術學院（現清華大學美術學院）專注傳統藝術，去過新加坡經營畫廊，又曾喺北京設立工作室，喺台灣、日本展開文化研究，最終扎根香港。主辦方介紹，謝克作品涵蓋裝置、雕塑、繪畫、書法等，帶有批判思維同文化反思，擅長以明亮色彩同幽默造型傳遞正向人生觀。

主辦方下星期六（17號）會喺香港藝術中心搞講座，請到清華大學美術學院教授劉巨德、北京大學藝術學院前院長彭鋒等嘉賓，暢談藝術價值、收藏心得、香港藝術發展等。