【Emily】Google年度熱搜 黃澤林成「話題一哥」 宏福苑登本地頭條榜首 其次黑雨

【明報專訊】新年伊始，Google香港噚日公布舊年嘅熱門搜尋。香港網壇一哥黃澤林舊年創港將歷史，喺美國網球公開賽首闖32強，登上「本地話題人物」首位。

同樣躋身十大「本地話題人物」嘅仲有兩名政壇女新星，包括入職馬會不足一年就「轉跑道」嘅江旻憓，呢位「微笑劍后」去年一擊即中當選立法會旅遊界議員，成為熱搜本地人物第五位；由參選港姐到退選只相隔一日嘅民建聯西貢區議員莊雅婷就躋身第八位。

去年11月底大埔宏福苑發生奪命五級火，事件引起國際關注，短短一個多月就成為「本地頭條」熱門搜尋嘅第一位。去年本港經歷5場黑雨及14個熱帶氣旋，「黑雨」及掛波次數均打破本港天文台歷年紀錄，其中颱風「韋帕」及超強颱風「樺加沙」分別喺7月和9月底襲港，3個關鍵字分別佔據「本地頭條」熱門搜尋第二、第四及第五位。

「關鍵字」十強AI佔4 大S方大同上榜

人工智能使用愈趨普及，DeepSeek、Grok、Google Gemini及豆包都登上年度熱搜「關鍵字」十強。至於台灣女星大S（徐熙媛）及音樂才子方大同去年先後離世，亦係唔少港人關心嘅事，成為熱搜關鍵字嘅第三及第四位。