【Emily】訪4企員工 工會：盼加薪最少4.5%

【明報專訊】幾乎每個打工仔嘅願望都係升職加薪，香港公共事業工會聯合會10月訪問咗2032名港燈、煤氣、中電、電盈4間企業員工，了解佢哋對出年嘅薪酬期望，超過一半受訪者希望出年加薪幅度有4.5%或以上，另有超過60%受訪員工認為所屬企業嘅機制唔合理。工會建議明年劃一加薪唔少於4.5%，並根據公司業績派獎金，以增加歸屬感。

工會調查發現，近60%受訪員工今年加薪平均3%，無得加薪嘅人佔20%，其中68%電盈員工話「零加薪」。工會判斷，電盈嘅加薪幅度明顯比其他3間公共企業低，認為4企業始終以股東利益為導向，將「利潤最大化」置於員工福祉之上，長期忽視勞動者權益。

除咗加薪，工會要求調高員工入職待遇、加強培訓、延遲退休年齡至65歲、積極增加人手、減少外判，同時向員工加強人工智能方面嘅培訓，以提升工作技能。