【Emily】植潔鈴返母校分享「失敗」

【明報專訊】候任立法會港島東議員植潔鈴（Elaine）喺小西灣長大，中學讀福建中學，長大後喺東區做區議員。今年係香港福建商會辦學100周年，Elaine噚日返母校同師弟妹分享「失敗」，話希望大家能夠將每次嘅跌倒化成下一次向前嘅一步。

37歲嘅Elaine喺10年前首次參選區議會，敗選後經補選進入區議會，2019年再次敗選，一度投考警隊。今年佢以2.2萬多票當選立法會議員，佢同師弟妹分享，話今日嘅佢唔係由一次成功而成，而係經過無數次失敗、挫折同修正，一步步走到今日，今日佢未算成功，但就學識面對失敗，從中了解自己，認清方向再出發。

佢又引校監黃周娟娟喺一次專訪提過「欲明大道，必先知史」，話歷史由好多失敗交織而成，希望同學記得失敗並不可怕，可怕係拒絕反思、拒絕再企起身。