【Emily】義工贈別顏汶羽 直幡製環保袋留「顏」面

【明報專訊】仲有唔夠半個月，現屆立法會議員就卸任，好多人都忙於收拾物資、移走街上海報橫額、同工作伙伴道別，未能連任嘅民建聯九龍東顏汶羽（Frankie）喺選舉過後仲四出同唔同義工道謝，噚日佢話有義工用拆落嚟嘅直幡改造成大大個「顏」字嘅環保袋送畀佢。

Frankie話啲義工想多謝佢，咁多年來聽同跟進求助，解決佢哋生活大小難題，收禮嘅佢就話非常感觸，雖然未能連任，但都會繼續服務香港。

送別梁熙 團隊立會拉banner

至於同屬民建聯嘅港島東梁熙無競逐連任，支部團隊日前去立法會「拉banner」送別，東區區議員陳凱榮喺社交平台寫咗「致梁熙的一封信」，提到梁熙4年前到東區服務，過去4年一齊面對疫情、「世紀黑雨」同幾次超強颱風，每次梁熙都喺第一線跟進，呢種精神感染咗成個團隊。梁熙就留言感謝。