【Emily】馬年郵票 1‧5售 有燙金燙銀

【明報專訊】明年係馬年，香港郵政噚日宣布會喺下月5號發售以「歲次丙午（馬年）」為題嘅生肖郵票，同日亦會推出「靈蛇駿馬」十二生肖金銀郵票小型張，同埋由中國郵政、香港郵政及澳門郵電共同發行嘅馬年聯合紀念套摺，市民當日起可以喺全線郵政局同香港郵政網上購物平台「郵購網」購買。

「歲次丙午（馬年）」一套4枚郵票、兩張郵票小型張及相關郵品各以唔同姿態嘅駿馬做主題。10元郵票小型張同50元雷射剪紙郵票小型張就以年花圖案為馬身裝飾。50元郵票小型張嘅剪紙圖案以雷射技術切割，刻劃出細緻嘅駿馬剪影。

至於題為「靈蛇駿馬」嘅十二生肖金銀郵票小型張，嵌有「歲次乙巳（蛇年）」郵票及「歲次丙午（馬年）」郵票，面值各50元。郵票上嘅靈蛇同駿馬分別用銀箔及22K金箔燙壓點綴，仲附有黃金成色證明書。