【Emily】米埔同滬濕地成「姊妹」

【明報專訊】漁護署周二（9日）同上海市林業局簽署遷徙水鳥保育合作諒解備忘錄，標誌香港米埔內后海灣拉姆薩爾濕地同上海崇明東灘鳥類國家級自然保護區（圖），正式成為「東亞—澳大利西亞遷飛區伙伴關係保護地網絡計劃」下嘅姊妹濕地，日後兩地將會喺遷徙水鳥研究、棲息地協同管理等領域合作。

位於東亞—澳大利西亞遷飛區範圍內嘅米埔濕地同上海東灘，一直都係《濕地公約》嘅國際重要濕地，亦為每年遷徒水鳥提供重要覓食同棲息地。國家林草局副局長李雲卿話，今次合作係滬港兩地積極履行國際公約、深度參與全球生態治理嘅務實行動，為全線保護遷飛區樹立良好示範。漁護署長黎堅明就話，今次合作將加強兩地濕地保護嘅交流，推動人與自然和諧共生嘅核心理念。