【Emily】《中年》歌手惜惜贊助品 通訊局裁「誇張」發勸喻

【明報專訊】近年本地電視節目已容許間接宣傳，但太誇張都未必合規。通訊局噚日公布兩宗關於無綫電視嘅投訴，其中一宗涉及《中年好聲音321經典大戰》，話8個歌手喺節目尾聲邊唱情歌邊手持贊助產品「深情凝望」甚至親吻，畀人一種唔自然嘅感覺。通訊局審議後認為歌手表現「誇張」，影響觀賞趣味，有違《電視廣告守則》中「表達手法須自然及不突兀的規定」，決定發出勸喻。

無綫：表謝意符合內容 表達算自然

涉事集數係《中年好聲音3》今年6月15日播出嘅最後一集，節目尾段8個歌手一邊唱住陳百強嘅《有了你》，一邊手持藥油、樽裝水等贊助產品深情凝望同親吻。通訊局引述無綫解釋話，旨在向贊助商表達謝意，所以產品同品牌名喺環節出現符合內容所需，整體表達方式亦算自然。

不過通訊局就唔認同，認為嗰個環節過分展示贊助產品，歌手深情凝望同親吻產品嘅表現誇張兼唔自然，亦令人覺得突兀，裁定節目違反《守則》。

另一宗投訴則牽涉一個喺無綫播放嘅「必理痛」廣告，聲稱屬「連續30年銷量No.1止痛藥品牌」。通訊局認為廣告無註明銷售排名涵蓋嘅地區，其中一款產品亦唔屬於銷售排名嘅涵蓋範圍，所以向無綫強烈勸喻。