【Emily】郭偉强謝票話街坊戥佢唔抵 「票后」擬橫額轉贈狗場

【明報專訊】立法會選舉塵埃落定，無論勝敗，唔少候選人呢幾日都忙住四出謝票，特別係參與直選嘅人。工聯會郭偉强同陸頌雄今次分別由勞工界同選委會界別「轉跑道」，喺港島西同新界西北爭取連任，最終敗北，佢哋噚日都落區謝票。

港島西5個候選人中，得票排第三嘅郭偉强噚日走勻上環、西環同香港仔謝票，多謝街坊支持同信任，仲話有街坊戥佢唔抵添！喺新界西北得票排第四嘅陸頌雄就去咗屯門謝票，話會繼續堅守服務社區、服務工友，全力維護勞工權益。

至於喺九龍東爭連任落敗嘅民建聯顏汶羽，佢喺宣布結果當日朝早喺社交平台發文，多謝市民過去18年嘅支持，之後未再更新。

會計界黃俊碩亦喺前日喺社交平台發帖後無再更新，佢提到今次選舉得票比上屆多，但最終都未能連任，將喺其他崗位服務業界。

另邊廂，多個當選人亦四出謝票，「票后」方國珊噚日喺康城等地方謝票，又喺社交平台話有大量用完嘅宣傳帆布橫額，可以轉贈狗場。

得票第二多、喺九龍東連任嘅工聯會鄧家彪就同大班團隊，喺區內多條屋邨嗌咪謝票。