【Emily】田二少提政改 冀下屆立選實現333 話曾向中央倡議 盼容納小黨其他板塊

【明報專訊】實政圓桌議員田北辰成功將新界西北議席「交棒」莊豪鋒（Mark），兩人噚日見傳媒，話該黨以敢言、勤力拉票等制勝。田二少提及2021年向中央建議過「333」選制（直選、功能界別、選委會界別各30席），即直選每區3席，否則得20席容易畀大黨壟斷，市民覺得無得揀就唔投票，希望下屆選舉「333」成真，容納更多小政黨同其他板塊。被問當選後會唔會跟進政改，Mark話𠵱家係「拋磚引玉」，希望認同嘅議員集思廣益。

對莊豪鋒3.4萬票「跌眼鏡」

田二少話上屆新界西北有13.4萬人投票，今次面對大黨同鄉事派對手，最初估計若親自出馬，只要超過3萬票都收貨，對莊豪鋒奪3.4萬票「跌眼鏡」。Mark就話感覺到實政圓桌嘅光譜有得發揮，而勝選有賴「天時地利人和」，例如田北辰近日就社會關注嘅事發聲，幫手爭取支持；自己日後會跟進屯門跨海鐵路、網約車、爭取大欖隧道非繁忙或一般時段免費等。

莊盼4年後搣甩「接班人」

對於點搣甩「接班人」標籤，Mark話初頭外界唔熟自己，所以標榜「接班人」強調團隊往績，畀人了解佢嘅關注、政黨風格，希望4年後外界睇到嘅係實政圓桌風格，「唔再講邊個嘅接班人」。田就話自己作為政黨召集人，日後會直接接觸政府，而Mark就喺議會發聲，如果政府開簡介會，佢會作為工作人員旁聽。Mark就話田有人脈，自己就從官方途徑攞資料，可以互補。至於會唔會幫手諗質詢問題，田二少就話成個團隊不嬲都一齊傾。

另一「新丁」、新界北候任議員譚鎮國噚日接受電台訪問，提到面對火災，來屆議會要盡快改革制度，包括即刻推行工地全面禁煙。對於北區職住不均問題，佢話會搞大型招聘會、改善交通、推進北都發展。