【Emily】吳佩慈拍片讚楊哲安 陳志雲撐新民黨兩人

【明報專訊】距離立法會選舉仲有兩星期，候選人「拉票戰」如火如荼，其中港島西候選人楊哲安繼日前搵藝人馬天佑合唱、搵太太張新悅拍片拉票，再搵嚟老婆好友、台灣女星吳佩慈助選。吳佩慈拍片讚楊哲安尊重女權，明白女性朋友想要啲咩，對教育範疇都有研究，「朋友孩子有一些讀書的問題，我也常常請他們幫忙」。佢又話同楊哲安識咗廿年，形容對方有修養、非常多冷笑話。

講到演藝界幫手拉票，陳志雲日前就為新民黨港島西候選人陳家珮拍片助選，其間提到同新民黨主席葉劉淑儀認識多年，希望佢帶嚟嘅議會文化得以延續；同屬新民黨嘅港島東候選人郭浩景日前都獲陳志雲到街站站台，向市民派傳單、打招呼。新界西南候選人陳穎欣、新界東北候選李梓敬近日就分別搵導演高志森拍片拉票。各區候選人資料詳見網站（shorturl.at/0al8e）。