【Emily】九龍灣站指示牌最快12月加番「淘大」

【明報專訊】港鐵繼早前何文田站出口燈箱指示牌「改名」掀爭議後，九龍灣站B出口指示牌亦被發現由原本「淘大花園/商場」，改為本月揭幕嘅「東九文化中心」，淘大花園業委會主席葉興國話居民情感受到傷害，當時有網民公開點名要求實政圓桌立法會議員田北辰繼何文田站後幫手跟進。田北辰噚日同Emily講，港鐵已應承會改番指示牌名稱，加番「淘大花園/商場」，最快12月初會完成。

田北辰話呢兩個星期一直跟進事件，每隔幾日就搵港鐵高層問進度，噚日收到好消息，如無意外港鐵最快12月初改番指示牌名稱。不過佢話覺得都係唔夠快，會繼續要求加快完成。

港鐵早前回應改牌名準則，話指示牌一般優先考慮顯示出入口最近建築物，同時會因應有更具代表性地標或者公共服務設施建成、乘客使用情况等更新，日後會加強同持份者溝通。