【Emily】提早年結 訪港郵輪船次料升26％

【明報專訊】香港郵輪旅遊市道繼續向好，雖然今年尚未完結，但旅發局主席林建岳提早總結話全年將有近190個郵輪船次訪港，按年升26%，涵蓋22個國際郵輪品牌，而頭三季訪港郵輪旅客總流量約27萬，比舊年同期多22%。皇家加勒比國際遊輪旗下嘅「海洋光譜」號噚日嚟咗香港，再次開展以香港為母港嘅航程，林建岳話，好開心見到今年有唔少國際郵輪品牌以香港為母港或始發港，又或安排旗下郵輪停靠香港，帶動更多國際旅客訪港。

旅發局話，隨住本港已踏入郵輪業旺季，今個月已有9個品牌共10艘郵輪訪港，單月提供共19個船次，當中5艘係以香港作為母港或始發港，除咗「海洋光譜」號，亦包括名人郵輪嘅「名人極致」號、歌詩達郵輪「歌詩達莎倫娜」號、星旅遠洋郵輪「鼓浪嶼」號、麗星郵輪「領航星」號。

旅發局認為郵輪旅遊唔止係休閒旅客嘅熱門選擇，亦為大型企業「會獎旅遊」旅客提供新體驗，該局上月喺主題式會獎旅遊指南《香港會獎全攻略》加入「郵輪旅遊」主題，介紹郵輪旅遊點樣為會獎之旅注入新元素，盼豐富會獎旅客嘅商旅體驗，鞏固香港作為亞洲郵輪會獎樞紐地位。