【Emily】區議員新界東南支持葉傲冬+李貞儀+方國珊+張美雄+陳志豪

【明報專訊】今屆立法會選舉每個地區同界別都有競爭，新界東南有5人參選，包括民建聯葉傲冬、工聯會李貞儀、專業動力方國珊、報稱無黨派嘅張美雄，同埋新民黨陳志豪。佢哋政綱各異，睇佢哋嘅社交平台，葉傲冬提及新能源經濟發展；李貞儀關注長者樂齡生活；方國珊提到人寵共融；張美雄講及鄉郊工作；陳志豪就提到智能停車場。雖然關注點各有不同，但佢哋都同樣獲得沙田區議員梁振邦支持。

前沙田區議員趙柱幫早幾日喺社交媒體出帖及圖片，見到5個候選人嘅易拉架上都有梁振邦頭像，有啲印全力支持、有啲話信心推薦，網民見到都忍唔住問可唔可以跟佢5個都支持。其實，按照選舉規定，地區直選採雙議席單票制，選民可以支持全部候選人，但投票時只能夠揀一個人，否則選票作廢。