【Emily】區議員扮投票箱 街馬搶fo 陳美寶跑兩公里不忘選舉

【明報專訊】香港噚日各處舉行唔同嘅賽跑或戶外活動，包括「嘉里香港街馬2025」，部分參加者奇裝異服搶焦點，其中一個焦點應該係一名參加10公里挑戰組嘅跑手，佢將自己打扮成一個「投票箱」，沿住將軍澳跨灣大橋邊跑邊揮手，「投票箱」上仲貼咗「票箱家族」人物公仔。

話同阿仔完成首個10K

原來呢個跑手係西貢區議員張展鵬，佢同Emily講之前有跑全馬，噚日就陪阿仔跑，話好開心可以同囝囝完成佢人生第一個10公里賽，兩父子仲可以一齊衝線。佢話投票箱構思係阿仔諗出嚟，咁啱屋企又有個紙箱，兩人就用咗一晚整好。

出席活動嘅官員當然都唔放過宣傳機會，運輸及物流局長陳美寶喺賽事致辭時話，今次賽事會經過新基建道路，話大型基建要經立法會撥款，所以都係嗰句，叫大家12月7日投票。陳美寶都有參加兩公里領袖跑，有參與基建工程嘅部門包括路政署、消防處、土拓署等人員亦有落場。

不時現身長跑活動嘅教育局長蔡若蓮就話，每次落場跑步都畀佢體會到運動帶來嘅正能量，令佢明白人生就像馬拉松，「最重要的是不斷向前，不輕言放棄」。佢話噚日好開心見到逾百名校長帶同學生參與，展現活力朝氣。而局長當然不忘在場呼籲大家投票。