經濟
藍十字推「熊襲擊附加保障」 全球適用
【明報專訊】近期日本「熊出沒注意」頻繁，北海道、東北等熱門旅遊地點，都係野熊出沒嘅高風險地區，藍十字就公布推出「熊襲擊附加保障」，適用於指定旅遊保險產品，自即日起至明年3月31日，受保人如果喺旅程中唔好彩因野熊襲擊而要喺海外接受治療，索償時可獲額外3000元現金津貼，保障範圍唔限日本，適用喺全球任何有熊出沒嘅旅遊目的地。
藍十字亦提供「熊出沒」自救貼士，野熊通常係清晨同黃昏出沒，如果「有緣相遇」，應該立即停下腳步，唔好奔跑並緩慢後退撤離，保持目光注視熊。如果野熊突然猛衝，呢個係警告行為，應原地企喺度唔好郁，被熊襲擊時應該立即採取保護姿勢，用背包護住背部、以地面保護腹部、雙手緊護頸部與頭部。如果揸車遇上熊，就應留在車內並關閉車窗，唔好鳴笛刺激，等熊離開後再緩慢駛過。
