【Emily】報販指先導計劃覆蓋不足 倡完稅煙標籤涵報攤士多

【明報專訊】政府推出控煙十招，其中一招係「完稅煙標籤制度」，而海關本周已展開第二階段先導計劃，完善咗個標籤。不過香港報販協會認為計劃問題係覆蓋範圍不足，只限於部分指定便利店，而且受邀參與計劃嘅香煙牌子銷量「十分有限」，呼籲第二階段納入更多主流香煙品牌，同埋延伸至報攤、士多等銷售點，盡早幫佢哋過渡。

憂年老報販難適應新制

協會主席林長富（圖，協會提供）話，佢去咗十幾間參與計劃嘅便利店實測，發現前線店員對完稅標籤作用「一頭霧水」， 更有店員以為「完稅標籤」代表產品係「爆珠」口味，佢擔心年老報販更加無法適應新制度，甚至被「白牌煙商」用假冒標籤蒙騙；而且協會喺便利店只買到一款貼有試行完稅標籤嘅「紅雙囍」，反映品牌有限。林長富又話連鎖便利店一向無賣「白牌煙」，部分報攤及士多等先係「白牌煙熱點」，建議延伸先導計劃覆蓋範圍。