【Emily】致敬全運健兒 友邦周日請坐摩天輪

【明報專訊】相信唔少人噚晚都見證男子花劍港隊取得全運會金牌，香港運動員今屆喺全運會拿下多面獎牌，成績亮麗，友邦香港噚日話，星期日（23日）請全港市民同遊客免費坐中環海濱嘅香港摩天輪，以向參與全運會嘅所有運動員致敬。

摩天輪開放時間由朝早11點至晚上11點，市民當日去到摩天輪售票處，就可以免費攞到即日門票，每人每次最多可以拎一張，之後就可以去坐，門票數目雖不設上限，但實際會因應載客量同開放時間而定。友邦大讚運動員不斷有卓越表現，展現出頑強拼搏、不斷超越自我嘅體育精神，激勵無數人追求卓越。