【Emily】嘉里街馬跑入中九龍繞道 周日凌晨1點起分段封路

【明報專訊】「嘉里香港街馬2025」慈善跑星期日（23號）朝早舉行，賽事主辦方噚日話今屆賽道會有突破，全馬、半馬選手嘅壓軸路段將會係下月21日開通嘅中九龍繞道。為配合賽事，當日凌晨1點至下晝1點運輸署將分階段封路，港島北、九龍東同將軍澳多處將分階段實施臨時特別交通同運輸安排。

大會話，全馬、半馬選手將由靠近東區醫院嘅東區走廊起步，穿過東隧跑到九龍，壓軸路段係尚未通車嘅中九龍繞道油麻地段，並以油麻地交匯處做終點。10公里賽事就由調景嶺起步，跑上將軍澳跨灣大橋，進入將軍澳-藍田隧道，再經觀塘繞道跑到觀塘海濱花園終點。

運輸署當日將封閉部分主要道路，港島東區、灣仔、中環等多條道路凌晨1點起封閉至8點半或9點，觀塘道、偉業街、太子道東同九龍灣一帶亦會封路至中午時分，詳情留意運輸署網頁。另外，為方便全馬同半馬參賽者去銅鑼灣起跑，港鐵會提早開出頭班車，九巴會有特別路線960R由洪水橋出發，接載洪水橋、屯門一帶嘅參加者去銅鑼灣。