【Emily】廟宇文化節展7層盒子燈 增非遺元素 有免費攤位遊戲

【明報專訊】民青局同華人廟宇委員會主辦、兩年一度嘅「廟宇文化節」12月13至14日喺沙田車公廟外嘅翠田街足球場舉行，將特別加入非遺文化元素，於開幕當日會展示7層花燈「盒子燈」，有祈福意味。

12月13至14日辦 有皮影戲工作坊

「廟宇文化節」會以非遺文化「盒子燈」揭幕。「盒子燈」係一種層疊式嘅花燈工藝，點亮嘅時候會逐層展開，開幕當日嘅大型「盒子燈」展開後，可見到7層唔同祝福意義嘅花燈，包括「聚寶盆」、「五穀豐登」同「福祿喜樂」等主題燈飾。傳統嘅「盒子燈」係透過煙火燃點嚟展開，今次就改為更安全嘅電源控制，並融合咗香港紮作技藝嚟製作。現場會搭設牌樓、掛滿紅花燈，遊客可前往祈福同「打卡」。文化節另設兒童粵劇妝服體驗、陶瓷廣彩、皮影戲、手工撥浪鼓等多個工作坊。

文化節今次以「廟宇漫遊」為主題，準備咗4場車公廟導賞，其中一場邀請聽障者協助手語導賞。攤位遊戲就以6間法定古蹟廟宇同兩間一級歷史建築為主題設計，畀市民了解本地廟宇文化，包括有大坑蓮花宮、鴨脷洲洪聖古廟、九龍城侯王古廟、大澳楊侯古廟、灣仔北帝廟、西貢佛堂門天后古廟、紅磡觀音廟同長洲北帝廟。

參加者完成攤位遊戲後可換取紀念品。市民可免費入場玩攤位遊戲，工作坊及導賞須預約，詳情可留意華人廟宇委員會網頁同facebook。