【Emily】警社媒粉絲破700萬 「小編」盼跨同溫層

【明報專訊】近年唔少政府部門開設社交媒體宣傳部門工作，警方自2013年開YouTube頻道後，連同facebook、小紅書及抖音等，𠵱家總共有9個官方社交平台帳號。警方話9個帳號粉絲數目突破700萬人，成為人氣最高嘅政府官方帳號。

新一份警隊刊物《警聲》訪問咗高級督察陳逸婷，分享身為「小編」喺內容創作及平台管理嘅心得。佢話舊年日均直播兩場，就算無現場畫面，亦以文字發布資訊。今年9月鰂魚涌地盤發現戰時炸彈，警方拆彈後邀請爆炸品處理課專家解說，加深公眾了解警務工作。

陳又話同過藝人甄子丹及已故嘅許紹雄合作，希望突破同溫層，畀更多市民接觸警務資訊。警方官方抖音帳號至今成立兩周年，佢話過去一年帳號喺全國政務號粉絲增長榜中排第三，粉絲數目將突破500萬，預告將有重量級嘉賓登場。