【Emily】太空館辦航天展 窺探「天宮」實驗

【明報專訊】中國航天員（太空人）早前因為神舟二十號載人飛船返回艙破損，一度要延長逗留喺太空站，引起唔少人關注中國載人航天工程嘅歷程。香港太空館咁啱喺呢個時間舉辦「航向太空——中國載人航天之旅」展覽，內容包括介紹喺距離地球表面約400公里近地軌道上運行緊嘅天宮空間站。

展覽亦會講解航天員喺空間站開展嘅多項科學實驗任務，參觀者可透過顯微鏡觀察渦蟲標本，了解空間站研究渦蟲再生能力嘅實驗，亦可觀察魚缸內嘅斑馬魚，對比喺空間站飼養嘅斑馬魚行為上嘅差異。

展覽即日起至明年4月27日舉行，免費入場。展覽仲會介紹航天員訓練歷程，包括播放航天員水中訓練影片。為配合展覽，太空館天象廳亦推出天象節目《築夢天宮》，講述中國自主建成天宮空間站嘅歷程。