【Emily】中總及總商會辦選委界論壇 勞工背景者憶與商會淵源

【明報專訊】距離立法會選舉投票仲有3星期，香港中華總商會、香港總商會噚日合辦選委會界別論壇，50個候選人向現場近百個選委介紹理念，當中大部分人發言圍繞經濟、發展，有勞工背景候選人講政綱同時數歷史，講述同商會淵源。另外，四大商會近日力谷選民投票，中總會長蔡冠深就同Emily講，雖然無統計幾多會員提供投票優惠、便利員工投票嘅措施，但估計反應熱烈；不過商會無要求員工提供投票證明，始終投票係員工自由。

論壇上，部分勞工背景候選人特別提到同商界嘅合作。工聯會曾志文發言時先回顧歷史，講到1960年代中總同工聯會一齊派米賑濟火災災民，覺得工聯會同工商界係「穩固民心嘅基石」，相信雙方有好多合作空間。黨友黃國就談到1960年代香港嚴重缺水，中總同工聯會聯手建議東江水供港。勞聯林振昇憶述，十幾年前經勞顧會認識中總永遠榮譽會長何世柱，對方教自己勞資官溝通要「理性、務實、坦誠」，三方關係良好先有利社會穩定發展，承諾當選後會秉承呢份精神。

中總：勞資合作得好 港發展得好

完場後Emily問中總副會長樊敏華，商會會員會唔會傾向支持工商界候選人，佢話勞資一向好多合作，「勞資合作得好，香港先發展得好」，而𠵱家勞工界都着重搞好經濟，覺得雙方利益一致，相信會員主要睇番候選人政綱同工作成績。各候選人資料見選舉網站（www.elections.gov.hk/legco2025/chi/intro_to_can_ECC.html）。