【Emily】二創《無間道》籲投票 鄧炳強天台拍片叫「揀個好」

【明報專訊】政府連日宣傳立法會選舉，特首及官員早前都拍統一嘅宣傳片，政府社交媒體「添馬台」噚日播出特首李家超同3名司長嘅片段，佢哋喺鏡頭前輪流呼籲選民投票，截至噚晚9點宣傳片喺YouTube吸引到約600個觀看次數。同日，保安局長鄧炳強喺facebook播放二次創作電影《無間道》嘅天台場面短片，至晚上9時獲逾2000個like、逾百次分享。片中鄧炳強喺天台扮等人，同保安局常任秘書長李百全講「4年又4年，嚟到第8屆啦」，又話「有得揀，揀個好，千祈唔好揀錯」。

李家超拍宣傳片

「展優質民主應有特徵」

李家超晚上喺fb上載自己嘅宣傳片，並喺帖文提到2021年立法會選舉後，國務院新聞辦發表咗《「一國兩制」下香港的民主發展》白皮書，回答咗「香港的民主從哪裏來」、「誰是香港民主真正的創立者」、「香港需要怎樣的民主制度」等根本性問題，話對政府做好選舉工作有「指導意義」。

李家超話，政府帶頭呼籲投票，多個商會同企業亦推出鼓勵措施；候選人就「以政綱論高低，以能力決勝負，以形象爭認同」，從街站到比併政綱，再到選舉論壇，「每個環節都展現出優質民主應有的特徵」，體現中央對香港立法會選舉、民主發展嘅期望同要求。