【Emily】中日緊張 馬軼超：兩地旅界可增民間交流 江旻憓唔受訪 昨推政綱涵建「好客香港」品牌

【明報專訊】中日呢排關係緊張，內地更呼籲中國公民避免赴日。Emily問過競逐立法會旅遊界議席嘅兩名候選人點睇，其中馬軼超（圖）收到問題15分鐘之後回覆，提出兩地旅遊界可以多啲民間交流；對手「劍后」、美國史丹福大學國際關係學士畢業嘅江旻憓（Vivian），其助理大約一日後話Vivian唔接受訪問。江旻憓公布參選兩個禮拜後，噚日喺社交網站公布一頁共6點嘅政綱，包括塑造「好客香港」全球品牌、常態化政企溝通機制等。

馬軼超話，日本係港人最熱門旅遊目的地，旅行社係唔係出團交畀旅行社自行決定，佢建議自由行港人要買夠旅遊保險，同埋避免前往政治敏感地方，最好有人結伴同遊。至於日本訪港旅客數字本身按年回升，佢話今年一直處於上升軌道，相信唔會受影響。

馬軼超話，一般日本老百姓好有禮貌，加上日圓匯率低，相信依然係港人首選旅遊目的地。佢話目前情况下，旅遊界應該同日本旅遊界多舉辦兩地民間交流活動，協助兩地政府推廣中日友好關係。

香港同日本交流都繼續，例如行政會議成員、自由黨張宇人日前去日本駐港總領事館協辦嘅秋祭活動。香港旅發局都繼續向日本旅客宣傳，話今年香港繽紛冬日節規模歷年最大。