【娛樂場】新歌《天損之人》 陳蕾以沉默應萬變

【明報專訊】陳蕾近日推出包辦曲詞新歌《天損之人》，「Hunter迷」的她不少歌曲靈感來自動漫《Hunter x Hunter》，包括《窮人的薔薇》、《神的不在場證明》和《伸縮自如的愛》，歌名靈感皆來自此動漫內的招式，被封為「Hunter三部曲」。

《天損之人》歌名跟「三部曲」一樣，靈感來自動漫角色拿酷魯的念能力「天上不知 唯我獨損」，帶在面對衝突，與其迎戰，有時候可能更想悄悄地逃走避開這些紛擾，代表一種人生態度。

自認怕事 「相嗌唔好口」

陳蕾透露歌名原本想叫「天上不知 唯我獨損」，「就係覺得呢一招好有型，所以想不如寫一首講被選中嘅人，所有黑仔嘢都比我遇到，『嘩，又係我呀？咁黑仔嘅！次次當災嗰個人都係我？』嘅歌。新歌所講的應對方法比較似係我的處理方式，自覺係怕事，通常遇到一啲是非或需要爭論的情况，我會選擇迴避」。她強調是迴避，不是逃避，「因為我唔想正面交鋒，正所謂『相嗌唔好口』，無謂大家一人一句傷感情，所以我會選擇用沉默去應對呢啲情况，令到件事個火苗在那刻慢慢熄滅，問題發生當刻最緊要就係解決咗個問題先，所以好多時都會講『唉，我啦！我啦！』，希望有機會大家都理性時再攞出嚟溝通。我交歌畀公司時係用《天上不知 唯我獨損》做歌名，不過同事覺得呢個名比較難記，所以最後選擇用《天損之人》，短啲又易記啲」。

《天損之人》MV特意邀請一班日本演員及模特兒飾演「天損之人」，他們經常被「失敗」找上門，例如打棒球屢揮棒落空，打桌球時總是打入白波「撻死」等，但他們沒有因此被擊敗，反而更自得其樂、互相安慰和支持，發揮出「我不入地獄，誰入地獄」的「我啦！我啦！」精神。