【Emily】司局長拍片 講家鄉話籲投票

【明報專訊】距離12月7日立法會選舉日唔夠一個月，公務員事務局長楊何蓓茵噚日喺facebook上載短片宣傳，片中副司長、4名局長同特首辦官員各自以家鄉話呼籲投票，話係「家鄉話家鄉情」，相信市民無論咩祖籍都熱愛香港，為香港未來應一齊投票，又形容呢個「溫馨提示」「當然適用於一眾公務員同事」。

短片中率先登場嘅係客家人、副律政司長張國鈞，佢用客家話呼籲一眾鄉親同親朋好友投票；其後係祖籍福建嘅教育局長蔡若蓮同財庫局長許正宇，兩人用閩南話叫大家投票，「支持咱的候選人」。山東人勞福局長孫玉菡就號召「山東老鄉」投票，特首辦主任葉文娟就用潮州話向「自己人」呼籲「投票才會贏」。而廣東番禺人嘅楊何蓓茵壓軸出場，分別用廣東話同普通話呼籲投票。

除咗政府，多間公營機構近日亦推出唔同嘅鼓勵投票措施，私隱專員公署噚日話已經成立專班，開咗3次會策劃點樣呼籲同事及市民投票；生產力促進局噚日就公布選舉日會為同事提供半日假，鼓勵員工踴躍投票履行公民責任。