【Emily】6廁所事務員獲食環署嘉許

【明報專訊】食環署噚日舉辦本年度傑出廁所事務員頒獎禮，嘉許6名廁所事務員，食環署長吳文傑讚揚佢哋辛勤工作敬業樂業。食環署話，正逐步將公廁清潔由街道清潔服務合約中分拆，改為專項合約方式獨立採購服務；新公廁管理服務合約亦加入條款，要求廁所事務員需曾接受相關職業培訓同具認可資格，期望提高服務水平。

傑出廁所事務員分別設金銀銅獎，奪得金獎嘅男、女廁所事務員都係來自馬料水海濱公廁；銀獎男女得主分別嚟自放馬莆公廁同香港仔大道公廁；銅獎男女得主分別來自科學館道公廁同放馬莆公廁。

食環署話，為提升公廁設施、管理同衛生水平，已積極善用科技提升公廁服務，例如喺15間公廁裝設傳感器，實時監測人流同環境參數，當偵測到異味濃度升至警報級別，系統會即時通知負責人安排清潔；仲會用嶄新空氣淨化技術催化分解污染物，從根源消除異味。

食環署亦喺全港約200個位於旅遊景點或使用率高嘅公廁安裝無線廣播系統，推廣廁所清潔衛生及正確使用設施嘅重要，呼籲市民珍惜公共設施，保持公廁清潔衛生。