【Emily】幸運二金多寶 11．25再攪珠

【明報專訊】本月4日6800萬元六合彩幸運二金多寶攪珠，結果由兩注瓜分頭獎；相隔3個星期，馬會將於11月25日（周二）晚上再舉行六合彩幸運二金多寶攪珠。馬會發言人話，今次未定金多寶金額，未知頭獎基金數目，而今次亦係今年首次喺同一個月舉行兩次金多寶攪珠。

翻查資料，馬會舊年10月先後舉行4次金多寶攪珠，分別係為慶祝馬會成立140周年，推出兩輪各有7000萬元頭獎六合彩金多寶攪珠，同埋為祝賀國慶75周年舉行兩輪國慶金多寶，每次各有頭獎基金7500萬元。

馬會舊年先後有10次金多寶攪珠，今年頭11個月會舉行10次，發言人話係去年5月優化金多寶後嘅安排。馬會當時宣布，金多寶攪珠會由過去一年大約7次逐漸增加到12次。發言人又話，金多寶攪珠次數增加，既為市民提供更多幸運中獎機會，亦可惠及庫房稅收同增加獎券基金收入，收益會回饋社會，惠澤社群。