【Emily】英王生日會 卓永興代表政府致辭

【明報專訊】英國駐港澳總領事館噚日中午同傍晚分別舉行英王壽辰派對，中午嗰場多名資深政商界人物同場，包括因見美國領事而遭建制圍攻嘅前政務司長陳方安生。噚日同場有部分官員同建制人物。據悉，副政務司長卓永興代表政府出席並有致辭，不過政府無對外公布演辭，同場有外交部駐港公署代表。

據民主黨前主席劉慧卿喺社媒刊出嘅照片，與會嘉賓包括陳太、前特首曾蔭權、東亞主席李國寶、行會前召集人夏佳理、立法會前主席曾鈺成、前公民黨議員梁家傑、會計界前議員梁繼昌等。卿姐話好開心見到老朋友，「見應該見的人」。淡出政界嘅陳太一直都有出席個別活動，舊年都有出席英王壽辰派對。

總領事戴偉紳傍晚喺第二場致辭時話，根據2023年數字，香港喺英國投資，高過中國內地或印度，而英國係香港第四大投資來源地。佢強調雙方關係實質、具策略性且持久，雖然可能有挑戰，但有信心香港同英國喺教育、科研、人文交流，及同源嘅法律制度下，中英同香港可一齊討論同克服呢啲挑戰。