【Emily】東華展名人珍藏 喚關懷吞嚥困難者

【明報專訊】食物除咗滿足口腹之慾，亦連結回憶同帶嚟盼望。東華三院旗下社企iBakery同煮餸易最近舉辦《人人都可以食得好》主題展，通過展示10名不同界別名人同家人飲食相關嘅珍藏展品，呈現食物喺人生唔同階段嘅重要意義，分享心中「食得好」嘅體會。主題展希望藉此喚起社會大眾對吞嚥困難者同長者飲食嘅關注，推動共融飲食文化發展。

翁子光憶嫲嫲 展40年歷史瓷筷

其中導演翁子光分享同嫲嫲嘅飲食回憶，話從小就體會到食嘅樂趣，嫲嫲即使年邁仍食得「立雜」，臨終前面對吞嚥困難，仍每天想嘗試唔同食物。佢將會展出用咗超過40年嘅綠色瓷質筷子，象徵一家人團圓嘅溫馨。

麥文記麵家掌舵人麥心睿提到，屋企有套「萬壽無疆」款式嘅骨碟和湯匙，以前請客或一家人食飯都會用到，對佢嚟講係回憶嘅味道；佢話老咗之後會好想食雲吞，希望日後可以研發雲吞軟餐，認為畀長者食到回憶中嘅味道好重要。

主題展喺金鐘添馬公園添馬茶座iBakery Gallery Café舉行至明年3月31日，上晝8點至下晝6點開放，周日同公眾假期休息。展覽開放時間或會因應餐廳營運情况調整。