【Emily】「零起點思維」 選委界吳傑莊擺街站

【明報專訊】距離立法會選舉不足一個月，大部分直選候選人近日頻頻落區宣傳。喺選委會界別，即使最新嘅選民基礎只有1468人，有候選人都落區，例如爭取連任嘅吳傑莊。佢噚日趁午餐時段喺中環擺街站宣傳參選理念，又呼籲市民投票。

吳傑莊團隊向市民派嘅單張除咗有其政綱，背面印有「12月7日齊投票」信息。吳傑莊同Emily講，選舉競爭激烈，覺得自己雖爭取連任，但冇優勢，佢會用「零起點思維」，當重新開始咁去選，所以會擺多啲街站、開直播。佢又覺得街站成效唔錯，譬如有外國人過嚟了解選舉。

噚日不時有選委到場為吳傑莊站台，包括佢嘅提名人全國政協常委姚志勝；香港東莞社團總會會長朱李月華、會計界候選人黃俊碩等都撐場。街站最終提早約半小時收檔，競選團隊解釋義工事忙，不過計劃之後每周都搞街站。會計界另一候選人係吳錦華。

另外，選委界別候選人陳曼琪噚日上咗HKG報同幫港出聲嘅候選人論政節目，回答勞工就業嘅問題。部分候選人拜會選委後上載合照，例如陳永光、何敬康等。其餘候選人名單詳見選舉網站。