【Emily】囚車貼立選海報 懲教所廣播籲投票 晤陳國基楊何 公僕團體：總動員支持選舉

【明報專訊】政府各部門落力宣傳立法會選舉投票，Emily噚日喺高等法院及區域法院外，見到運送囚犯出入嘅囚車都有貼上12月7日投票日海報。據知，喺懲教院所等候室內都有廣播呼籲投票。懲教署回覆查詢時確認，為呼籲在囚者及探訪者行使公民權利，署方喺懲教設施內外展示宣傳海報及播放宣傳短片或廣播。署方又話，選舉當日會配合選舉處依法例喺懲教設施內設專用投票站，畀合資格在囚者投票。

除咗懲教院所，喺柴灣港島東廢物轉運站外都有貼出宣傳投票日橫額及海報，各康文署及食環署場地亦唔例外。政務司長陳國基及公務員事務局長楊何蓓茵噚日就同4個公務員中央評議會職方代表及4個主要跨部門公務員團體代表會面。各團體代表話會「總動員全力支持立法會選舉」。

鷹君員工可報銷去投票車費

聖公會大主教刊文籲投票

商界亦鼓勵投票，鷹君集團無提供半日假期，但話員工去投票嘅本地交通費將獲報銷，並會提供餐飲禮券，以鼓勵集團旗下2000多名香港員工履行公民責任。

至於宗教界，身兼全國政協委員嘅香港聖公會大主教陳謳明就刊出文章，指香港𠵱家有唔少挑戰同困難，貧富差距愈來愈大、有房屋問題，而市民精神健康受困擾、家庭解體、零售市道低迷等。佢話有待大家投票選出嚟嘅議員及市民同心解決；亦希望新一屆議員能秉持住各宗教提倡嘅精神去服務社會，令香港成為一個充滿慈悲、博愛、和善、包容嘅家。