【Emily】長者周日港鐵免費 新渡輪5航線任搭

【明報專訊】嚟緊禮拜日（16日）係一年一度嘅長者日，多家公共交通公司提供免費優惠，65歲或以上長者當日用樂悠咭、長者八達通或者個人八達通，可以免費搭港鐵、輕鐵及港鐵巴士，60歲或以上長者出示長者咭或者樂悠咭搭新渡輪，亦有5條航線免費，包括中環至長洲（只限普通渡輪普通客位）、中環至梅窩（只限普通渡輪班次）、橫水渡（坪洲-梅窩-芝麻灣-長洲）、北角至紅磡，同埋北角至九龍城。

港鐵嘅免費優惠唔適用於機場快線、東鐵線頭等、東鐵線往來羅湖及落馬洲站嘅過境車程同埋高鐵，老友記要留意喇。