【Emily】中學生星巴克體驗 試勻手冲拉花烘焙

【明報專訊】香港星巴克咖啡店開設咗首間社區共融分店，近日仲舉辦「事業準備課程」，同非牟利團體青年成就香港部（JA Hong Kong）合作，畀青年認識餐飲業、工作世界嘅機遇同發展途徑，以培養知識同技能。活動安排近百個中學生觀察咖啡師嘅工作實况，又學習手冲咖啡、咖啡拉花同埋烘焙包點。

限時飲品設計賽 番石榴系列健康制勝

計劃為咗提升學生嘅創意同對餐飲市場嘅了解，特別新增「期間限定」創意飲品設計大賽，學生團隊需要喺限時內設計一款「期間限定」飲品，再推銷概念。評審團會根據創意、可行性、美感、味道同匯報技巧，喺9個工作坊入面揀出優異隊伍頒發「最具創意設計獎」，隊伍可晉級下年7月嘅總決賽，爭奪「終極創意大獎」。

今次勝出嘅學生團隊來自大光德萃書院女生團隊，佢哋以番石榴作為期間限定系列，以烏龍茶、氣泡水、檸檬水等作為基調，創作出賣點為健康、清爽同年輕嘅兩杯飲品。團隊成員、中五同學周卓思話可以體驗到咖啡店入面唔同嘅工作，了解到真實職場，同埋未來工作要具備嘅條件。