【Emily】《四徑》英國上畫 「開路人」衛奕信捧場

【明報專訊】由居港英籍導演Robin Lee執導嘅紀錄片《香港四徑大步走》，細膩記錄2021年新冠疫情下「香港四徑超級挑戰」多名跑手嘅故事，不論沿途壯麗嘅山景，抑或跑手嘅毅力同背後人生經歷，同樣觸動人心。四徑之一嘅「衛奕信徑」以熱愛遠足嘅前港督衛奕信命名，亦係佢在任時提出興建，原來最近紀錄片喺英國上映時，衛奕信都有入場觀賞。

「Hong Kong Four Trails Ultra Challenge」facebook專頁噚日上載咗一幅衛奕信同《香港四徑大步走》導演Robin Lee媽媽嘅合照，並提到非常多謝衛奕信入場觀賞，希望呢套紀錄片能夠令佢重溫美好回憶。

導演：希望令佢重溫美好回憶

全長298公里嘅四徑，包括港島徑、鳳凰徑、衛奕信徑、麥理浩徑。其中衛奕信徑以前港督衛奕信命名，1996年啟用，全長78公里，分為10段，貫穿香港南至北多個山嶺，橫跨8個郊野公園，長度僅次於100公里嘅麥理浩徑，一直深受山友同市民歡迎。