【Emily】施榮懷：食肆商界擬為投票市民提供優惠 奧蘇利雲同入境處長拍片 廣東話籲投票

【明報專訊】政府、社團、商界連日宣傳立法會選舉。香港北京社團總會會長、全國政協常委施榮懷噚日喺街站派選舉單張時受訪，話有食肆打算為投咗票嘅市民提供優惠，商界都商討緊購物優惠。有傳媒噚日問政務司長陳國基，為投票市民提供優惠會唔會犯法，佢就話選舉條例寫明何謂犯法行為，而企業提供優惠或假期時，唔可以叫選民投畀個別候選人。

陳國基：選舉條例寫明何謂犯法行為

施榮懷話已經鼓勵有營商嘅會員放半日假，以鼓勵員工投票，普遍反應理想。佢又話已知有十幾間餐廳計劃提供折扣，例如持投票卡可享食飯八折或八五折優惠，商界都商討緊更多優惠，例如工展會入場或購物優惠。

至於政府部門，入境處長郭俊峯就同舊年經優才計劃成為香港居民嘅桌球名將「火箭」奧蘇利雲拍片篤波，片段影住「12」同「7」號波，寓意12月7號選舉日，奧蘇利雲仲以廣東話呼籲投票。

海關關長陳子達亦同兩個副關長胡偉軍同許劍拍片，片中以舊式理髮廳作場景，陳子達飾演顧客同理髮師。三人大玩「食字」，先話「漂頭」（投票諧音）出色，再話頭髮「換界」（換屆諧音）對頭髮健康好重要，呼籲選民投票。