【Emily】匈牙利創新署偕科企首訪港 話下年再嚟

【明報專訊】香港金融科技周同創業節近年吸引唔少外國業界組團訪港，例如匈牙利同英國今年分別都有科技團來港前，順便去深圳睇吓騰訊等大型科技企業。

匈牙利創新署今年第一次帶咗6間科技企業同初創來港，率團嘅創新署營運總監Robert Somogyi同Emily話，相比內地城市，香港比較開放同明白歐洲，形容香港係歐洲企業來華「第一站」。佢話今次隨團公司見到唔少朋友，下年會再帶初創公司來港。

去埋深圳 話親身睇中國感覺唔同

隨團嘅影片製作公司創作總監Attila Kristof話，深圳之行見到科技先進，開咗眼界。佢話有時喺匈牙利聽到有關中國政治嘅講法，而親身嚟中國睇係完全唔同。另一團友、AI諮詢公司嘅Takacs Daniel大讚中國企業高水平，佢哋未必即時落腳，但都可以將此行部分見到嘅好橋或做法帶返歐洲。

另外，英國商貿部支持嘅創新科技考察團連續第三年來港，其中智能指環公司創辦人Paul Blair話，4年無見過中國生產商，指新冠疫情期間克服唔少困難，只能透過郵寄睇產品樣本，今次大家終於面對面見到。雖然部分外資將生產線轉離中國，Paul話呢幾年同內地公司建立信任，無呢個打算。

首次來港嘅評核平台創辦人Daniel Appleby話，公司有同新加坡等多個東南亞地區等地大學合作，指香港教育同創新科技生態好好，期待與香港嘅院校合作。