【Emily】黃鎮廷莫華倫撐九東顏汶羽張培剛

【明報專訊】全運會開幕，碰着立法會選舉期，近日唔少參選人都借全運會做選舉宣傳。九龍東選區有5個參選人，其中爭取連任嘅民建聯顏汶羽喺社交媒體出短片，搵咗「港乒一哥」黃鎮廷拍片支持佢，黃話顏汶羽有勤奮堅毅嘅港人特質。顏汶羽話全運會噚日開幕，乒乓球賽事亦已開始，佢都祝黃鎮廷能盡展所長旗開得勝。至於同區出戰同屬民建聯嘅張培剛亦唔輸蝕，搵咗男高音歌唱家、全國政協莫華倫同佢影握手相支持佢。

鄧家彪自稱九東彪記

陳進雄自評勝算唔高

九東5名參選人都有地區工作背景，有立法會議員、區議員或分區委員身分。參選人梁思韻都有搵名人支持，喺社媒頻密出帖，支持佢嘅包括爭取喺選委會界別連任嘅管浩鳴，話大家喺教育局嘅價值觀教育常務委員會共事多年。

工聯會鄧家彪亦頻開街站，噚日就網上直播九龍東區各界聯會代表陪佢喺藍田開街站，選舉口號形容自己係「九東彪記」。另一名參選人陳進雄喺社交媒體唔算活躍，幾日前喺社媒公布參選理念，又自言勝算唔係好高，但參選就係為咗畀市民更多選擇。選委會參選名單見：

www.elections.gov.hk/legco2025/pdf/ECC_c.pdf