方力申推job陪老婆待產 期待抱愛女

【明報專訊】方力申11月15日於澳門舉行《SHOW UP巡迴音樂會2025》，有別於中山、佛山、廣州、南海和江門演出，除唱自己歌，還揀選一些昔日「金牌大風」舊同事歌曲，包括古巨基《愛得太遲》等，重溫「金牌」年代美好回憶，「有樂迷留言話睇完中山演唱會感動落淚，給我好多反思，當我唱《好心好報》1000次後可能會『滑牙』，但首歌可能對樂迷好緊要，令他們好多感觸，現在我會換位替別人想，要更加用心唱，鞭策自己」。

相隔17年再開個唱，方力申多謝主辦賞識和鼓勵，表示28歲放下歌手身分，沒再出碟及開騷，轉戰影視圈，源於運動員心態，因自我要求高，覺得做不好，不敢做落去，「人大了心態有提升，覺得別人肯畀機會就好好做，慢慢進步。一直有做商演，一口氣唱8至10首歌都無問題，上年開了兩三場巡演再學跳舞，被邀上內地節目《聲生不息》，我跳唱郭富城《Para Para Sakura》，發現好多事肯做就吸引到不同機會」。

太太佗女辛苦 體會母愛偉大

方力申希望回港開騷，最快明年實行，笑言澳門站是「2025年告別演唱會」，完騷後要開始陪太太葉萱待產，以及上育嬰課程，已推掉一些工作，迎接女兒12月出世。他現在深切體會母愛偉大，「太太懷孕好辛苦，個肚好重，影響腰痛、腳抽筋，著不到鞋，有好多情緒，會喊，她最擔心BB健康，不知自己是否好媽媽，又怕產後難變瘦、變靚，要多陪伴她，有請她到澳門睇騷放鬆心情，反而我沒太多壓力」。

方力申期待擁抱B女一刻，又經常跟太太討論生育話題，「老婆本來打算生4個，後來怕生仔好痛想縮沙，暫時計劃生兩個，不是為追仔，只想小孩有個伴。太太已率先截住我，叫我不要攞個女出來賣，未決定將來會不會帶囡囡出來搵食，但已構想寫歌給女兒」。

讚B女腳頭好 未出世帶旺攞獎

方力申稱好友張繼聰育兒經歷豐富，將來會找對方取經，回想10多年前將張繼聰3歲兒子張瞻抱起拋高嬉戲，被張瞻婆婆鬧爆，現在覺得那時做法亂來，他笑說：「我將來會拋起自己個女玩，但想到別人拋我個女都會驚，要向張瞻婆婆道歉。」他大讚B女腳頭好，未出世已帶旺父親在世界先進游泳錦標賽連攞3金牌，又獲廣告商贊助嬰兒用品，承認要花時間學做爸爸，「幸好屋企多人幫手，我爸爸已答應為孫女改名，我媽和外母會幫手湊B」。

記者：鍾一虹